Awe fundashon LIKE – Lenga i Konosementu den Enseñansa ta lansa su wèpsait www.fundashonlike.com ku un variedat di informashon tokante nos enseñansa. Algun dia pasá fundashon LIKE a presentá su mes na públiko via di un rueda di prensa. Fundashon LIKE – Lenga i Konosementu den Enseñansa (Taal en Kennis in het Onderwijs) ta para pa mes chèns pa tur mucha den enseñansa. Na Kòrsou, Aruba i Boneiru hopi hopi mucha ta kai atras na skol. Pa gran parti esei ta debí na e echo ku nan no ta dominá un idioma ku ta habri porta pa e konosementu ku skol ta eksihí di nan. Ke men un idioma grandi (manera Ingles, Spaño i Hulandes) ku un variedat sin límite di buki pa lesa, buki di skol riba tur materia i pa tur edat, i tur otro material di informashon. Skirbí òf online.
Riba e wèpsait bo por haña tur informashon riba orígen i kousa di LIKE. Bo por sera konosí ku su direktiva i 12 siudadano di diferente edat i gremio profesional, ku ta splika pakiko nan ta sostené e meta di LIKE. Tambe bo por lesa preguntanan frekuente i kontestanan relevante tokante e tema Lenga i Konosementu den Enseñansa.
Fundashon LIKE ta spera ku mas informashon tokante e realidat di nos situashon di enseñansa ta duna un aporte na un diskushon nashonal konstruktivo. Kalidat di enseñansa ta toka nos tur. Ta pesei fundashon LIKE ta invitá henter komunidat di Kòrsou, Aruba i Boneiru pa tambe pensa, papia, i partisipá huntu kuné. Fundashon LIKE ta kontentu di a risibí tantu interés i reakshon positivo. Tin hopi mas trabou pa hasi. Bo tambe ke duna bo aporte na e proyekto bunita akí, komo boluntario òf donatùr? Por fabor tuma kontakto via di e wèpsait. Huntu nos por hasi posibel ku nos muchanan ta haña mes chèns den enseñansa.