Dia 20 di novèmber Fundashon LIKE – Lenga i Konosementu den Enseñansa – a organisá un rueda di prensa ku e tema: Mes chèns pa tur mucha. E rueda di prensa akí a tuma lugá na Biblioteka Nashonal Kòrsou.
Direktiva di LIKE a splika pakiko a lanta e fundashon i kiko e meta ta. Despues direktiva a kontestá preguntanan di prensa.
Lesa aki e komunikado di prensa:
Loke Fundashon LIKE ke logra
Fundashon LIKE a lanta pa promové mes chèns pa tur mucha logra den enseñansa.
Un enseñansa ku ta honra nan kapasidat pa siña i desaroyá nan mes. Ku asina ta reforsá nan sentido di balor propio. Ku ta habri nan bista pa mundu i alentá nan pa bira siudadano responsabel. Hende ku por komuniká bon pa nan por komprondé otro i funshoná den bida. Pa nan por sigui studia òf traha na un nivel ku ta kuadra ku nan inteligensia. Pa nan por buska informashon riba kualke tópiko ku nan ke. Pa nan por komprondé reglanan di nan pais òf simplemente sigui notisianan mundial.
Loke Fundashon LIKE ke superá
Na Kòrsou, Aruba i Boneiru hopi hopi mucha ta kai atras na skol. For di chikitu nan tin difikultat pa komprendé e lèsnan i pa forma frasenan kompletu pa ekspresá loke nan a siña i loke nan ta pensa. Esei no ta pa falta di inteligensia. Ta pasobra nan no ta dominá un idioma ku ta habri porta pa e konosementu ku skol ta eksihí di nan. Ke men un idioma ku un variedat sin límite di buki pa lesa, buki di skol riba tur materia i pa tur edat, i tur otro material di informashon. Skirbí òf online. Idiomanan grandi manera Ingles, Spaño i Hulandes tin tur eseinan disponibel. Meskos ku tur otro idioma chikitu, Papiamentu no tin basta hende ni merkado pa produsí esei.
E realidat akí no ta kita nada di e balor di Papiamentu. Papiamentu ta nos idioma nashonal i e ta importante pa sostené e mucha su desaroyo emoshonal for di chikitu. No mag prohibí mucha di papi’é na skol. Papiamentu meresé rèspèt komo parti krusial di identidat i kultura di Kòrsou, Aruba i Boneiru. Pero e balor di Papiamentu komo idioma nashonal di un banda, i mehoramentu di nos enseñansa di otro banda, ta dos asuntu diferente.
E sistema di nos enseñansa ta pone ku hopi mucha ta kai den un bashí despues di e promé añanan di skol. I esei ta sigui stroba nan henter nan bida. Paso den nos enseñansa hopi skol básiko ta duna lès na Papiamentu e promé añanan. Despues di algun aña skolnan ta kontinuá na Hulandes. No pasobra nan ta kontra di Papiamentu, sino pasobra mayoria fuente di informashon no ta eksistí na Papiamentu. Ni skirbí, ni online.
Den klasnan mas haltu, muchanan mester dominá un idioma mas grandi, aktualmente Hulandes, pa por komprendé e lèsnan. Nan mester por prosesá tekstonan pa muchanan mas grandi. Esei no ta posibel si e promé añanan nan ta haña mayoria di e lèsnan na Papiamentu. Si enseñansa lo a sigui na Ingles òf kualke otro idioma mas grandi, tambe nan lo kai den un bashí.
Loke mester hasi
Ta tarea di enseñansa pa duna tur mucha un base fuerte pa e por desaroyá su mes. LIKE ta promové un enseñansa ku ta duna tur mucha e mes base pa nan desaroyá tur loke nan tin aden Ke men un enseñansa riku na idioma, ku un variedat grandi di buki di lesa ku ta pika e mucha su fantasia. Un idioma ku e mucha ta kuminsá siña for di promé dianan di skol, pa e bin sintié kómodo kuné. Un idioma ku e mucha mester pa e por komprendé su bukinan di skol. Ku ta duna e mucha ala pa e yega na informashon riba tur tema. I ku ta habri porta pa tur konosementu ku e mester pa skol i komo adulto. Asina tur mucha ta haña mes chèns pa siña bon na skol i funshoná den bida.
Pa sostené e meta akí, pronto LIKE lo lansa un website ku un variedat di informashon riba e tema grandi akí pa komunidat. Fundashon LIKE ta spera di stimulá tur tur hende, organisashon i stakeholders pa saminá i analisá e realidat di nos enseñansa, pa por atendé di un forma sano i konstruktivo.