Nos Manifesto

Fundashon LIKE, Lenga I Konosementu den Enseñansa ta haña ku tur mucha den Reino tin derechi riba mes chèns den enseñansa: ku kapasidat igual mester por tin oportunidat pa desaroyá igual.

Pa fundashon LIKE enseñansa di bon kalidat ta un aspekto fundamental pa desaroyo: pa desaroyo personal di tur siudadano individual, pa desaroyo di nos idioma nashonal i nos kultura i pa desaroyo di nos komunidat den su totalidat.

Kada un riba su mes, niun di e partnernan den enseñansa lo no por yega na mehorashon di kalidat riba tur tereno. Pasobra realisashon di enseñansa eksitoso ta un pùzel kompliká i e diferente partnernan den enseñansa ta dependé di otro pa yega na esaki. Ta pesei meta final di LIKE ta pa e diferente stakeholdernan asumí nan respondabilidat i huntu krea un enseñansa ku ta brinda e mes base pa tur mucha desaroyá loke nan tin aden.