Ban Papia Kla

Ban Papia Kla

Na Kòrsou, Aruba i Boneiru hopi mucha ta kai atras na skol. For di chikitu nan tin difikultat pa komprendé e lèsnan i pa forma frasenan kompletu pa ekspresá nan mes. Esaki no ta pa falta di inteligensia di e muchanan. E ta debí na vários reto den enseñansa. Un di e retonan mas grandi ta falta di dominio di un idioma ku ta habri porta pa konosementu. Ke men un idioma ku un variedat sin límite di buki pa lesa, buki di skol riba tur materia i pa tur edat, i tur otro material di informashon skirbí òf online.

Dominio di idioma ta krusial pa tur mucha. Pasobra ta via idioma e ta yega na konosementu pa e siña, desaroyá su mes, i forma un bida pa su mes. Pero hopi mucha tin tiki dominio di un idioma ku ta habri porta pa konosementu. P’esei nan tin difikultat pa siña, kaba skol, traha òf sigui studia, i desaroyá komo adulto.

Pa haña e dominio di idioma ku skol ta eksihí, lesamentu ta krusial. Pasó gran parti di konosementu ta den tekstonan skirbí. P’esei mester lesa buki pa mucha for di chikitu. For di buki mucha ta siña palabra nobo i e ta siña forma frase mas kompletu ku e sa tende den bida diario. Podcast, youtube, i otro medionan visual no ta sufisiente pa logra esei.

Ta tarea di enseñansa pa traha riba dominio di idioma for di e promé dianan di skol. No ta tur mucha ta lanta ku mes chèns den bida. Pero skol por duna nan tur mes chèns pa desaroyá e kapasidatnan ku nan tin. Esei ta posibel si for di chikitu nan siña un idioma ku ta habri porta pa tur konosementu ku nan mester pa skol i pa funshoná den bida.